Энэ мэдээ хуучирсан буюу 2021/05/17-нд нийтлэгдсэн мэдээ болно.

Коби Брайант Алдрын танхимд мөнхлөгдөв

Ангилал
Бусад
Хэзээ
2021/05/17
Унших
1 минут 24 секунд
QR кодыг уншуулж мэдээг утсаараа унших боломжтой.

  Лос-Анжелес Лейкерс багийн домогт тамирчин Коби Брайантын нэрийг Жеймс Нейсмитын нэрэмжит сагсан бөмбөгийн алдрын танхимд мөнхлөв. Сагсан бөмбөгийн Алдрын танхимд мөнхлөхөөр шигшигдсэн тамирчдын нэрсийг 2020 оны дөрөвдүгээр сард зарлажээ. Ёслолын ажиллагаа наймдугаар сард болох ёстой байсан хэдий ч коронавирусний цар тахлын улмаас хойшлогдсон байна.

Үндэсний сагсан бөмбөгийн холбооны таван удаагийн аварга,  Олимпын хошой аварга, бүх оддын тэмцээнд 18 удаа оролцсон К.Брайант Лейкерс багийн олон амжилтыг эзэмшдэг бөгөөд үүнд хамгийн олон тоглолтод оролцсон, олон оноо авсан, олон удаа бөмбөг тасалсан зэрэг багтдаг юм.

Коби Брайантаас гадна Тим Данкан, Кевин Гарнетт зэрэг Үндэсний сагсан бөмбөгийн холбооны аваргууд, мөн тус холбооны эмэгтэй аварга, олимпын аварга Тамика Кэтчинс, дасгалжуулагч Руди Томьянович, Ким Малки, Барбара Стивенс, Эдди Саттон, менежер Патрик Бауман нарыг Алдрын танхимд элсүүлжээ.

Коби Брайант өнгөрсөн оны нэгдүгээр сард нисдэг тэрэгний ослоор амиа алдсан. Ослын улмаас амиа алдсан нисгэгч, 8 зорчигчийн дунд түүний охин Жианна байсан юм.

Энэ мэдээ хуучирсан буюу 2021/05/17-нд нийтлэгдсэн мэдээ болно.