УИХ-ын намрын ээлжит чуулганы хуралдаан эхэллээ. Чуулганы хуралдаанаар УИХ-ын гишүүн Б.Пүрэвдорж үг хэллээ.

Тэрбээр "Миний бие тэтгэврийг долоон жилээр бус таван жилээр тогтоох хуулийн төслийг, 2018 оноос хойш долоон жилээр тогтоогдсон иргэдийг таван жилээр нөхөн бодох хуулийн төслийг өргөн барьсан. Өнгөрсөн сард нэлээд тэмцэлдэж байж хэлэлцэх асуудлын жагсаалтад оруулсан.

Харамсалтай нь Нийгмийн бодлогын байнгын хороо энэ асуудлыг хэлэлцсэнгүй. НББХ-ны дарга өөрөө энэ хуулийг түүхий гэх зүйл яриад байгаа. 30-40 жил нийгмийн даатгалаа шударгаар төлж ирсэн хүмүүс таван жилээр хуулиа тогтоолгох л хууль юм. МАН үргэлж таван жилээр ажлаа төлөвлөдөг. Гэтэл ард түмэндээ тэтгэвэр олгохдоо долоон жил болгодог. Энэ хуулийг яаралтай хэлэлцэх шаардлагатай байна. Иймээс энэ сарын хэлэлцэх асуудалд нэмж өгнө үү" гэв.