БНХАУ-ын “Хос хэлний бодлого”-оор Өвөр Монголын сургуулиудад монгол бичгээр хичээл үзэхийг хориглосныг өвөр монголчууд эрс эсэргүүцэн тэмцэж байна. Бүх сурах бичгүүдийг хятад хэл дээр болгож, номын дэлгүүрүүдийг монгол бичиг дээрх ном худалдахыг хоригложээ. Монгол хэл судлалын докторантуудын тэтгэлгийг зогсоож, монгол хэл дээрх Bainu сошиал сүлжээг хаагаад байна.

Иймээс өвөр монголчууд хүүхдүүдээ сургуульд сургахгүй хэмээн тэмцэж байна. Хорио эхэлснийг мэдэлгүй хүүхдүүдээ сургуулийн дотуур байранд нь өгсөн эцэг эхчүүд хүчээр гарган авчээ.

Өвөр монголчуудын дамжуулсан мэдээлэл болон интернэтэд байршуулсан видео бичлэгүүдийг устгаж, утасны сүлжээг нь хязгаарлаж байгааг тэд хэлж байна. Мөн тэмцэлд оролцож буй хүмүүсийг эрэн сурвалжилж баривчлах үйл ажиллагаа өчигдрөөс эхэлсэн. Өвөр монгол эх сурвалжийн мэдээлснээр тэмцэл ширүүссэнээс хойш 2 хүн амиа хорложээ.