Г.Дамдинням: Зэсийн салбараа бодлогоор гаргаж ирэхгүй бол нүүрсээ шүтээд л амьдрана даа
Өнөөдөр УИХ-ын гишүүн О.Батнайрамдал тэргүүтэй гишүүд Засгийн газраас өргөн бариад буй Ашигт малтмалын тухай хуулийн өөрчлөлттэй холбоотой шүүмжлэлтэй байр суурийг илэрхийлж мэдээлэл хийсэн. Ингэхдээ "Зэсийн үнэ өсөж байхад төр нь авах АМНАТ-өө гурав дахин бууруулна гэж байгаа нь аль талд үйлчилж байгаа лобби вэ. Оюу толгойн хэлэлцээрийг ахалж байгаа ЗГХЭГ-ын дарга Б.Энхбаяр маш их хуулийн хулгай ярьсан мөртлөө үүнийг зөвшөөрч байгаа юм уу. Г.Дамдинням сайд Онтрэгийн хэлцэл эхлэхээс өмнө зэсийн АМНАТ-өө өөрөө санаачилж бууруулж байгааг аль талд үйлчилж байна гэж ойлгох юм бэ" гэсэн юм.
Тэгвэл эл байр суурьтай холбоотойгоор АҮЭБ-ын сайд Г.Дамдинням "Буруу л ойлгосон болтой байна. Зэсийн АМНАТ ОТ дээр 5 хувь тогтворжуулсан гэрээтэй байдаг. Шинэ хуулийн төсөлд зэсийн АМНАТ-ийг 5+5 буюу нийт 10 хувийн төлбөрийг ногдуулахаар тусгасан. АМТХ-ын 5.5-д Хувийн хөрөнгөөр хайгуул хийсэн ордын 34 хүртэлх хувийг төр үнэ төлбөргүй эзэмшихээр заасан. Онтре дээр 34 хувиа бид үнэ төлбөргүй авна. Түүнийг тусгай АМНАТ-р оруулж болно гэсэн хуультай. Шинэ хуульд тэр эрх хэвээр байгаа. Хөндөөгүй. Хөндөхгүй. Хэрэв бид зэсийн салбараа бодлогоор гаргаж ирэхгүй бол ОТ, Эрдэнэт гэсэн 2 төсөлтэй л байж байна. Өөр төсөл нээгдэхгүй. Шинээр нэмж татвар төлөгч бий болохгүй. Зөвхөн нүүрсээ шүтээд л амьдрана даа. Яаж өөрчлөх нь УИХ бүрэн эрх. ЗГ төслөө УИХ-д өргөн барьсан. АМНАТ-г хэд ч болгож өсгөх, бууруулах эрх нь УИХ-н онцгой бүрэн эрх" гэлээ.
