Талийгаач охины ах, дүү нарынх нь хичээл номыг тасалдуулахгүй сурах эрхийг хангах үүднээс Улаанбаатарт амьдрах харьяаллынх нь дагуу шилжүүлэн суралцуулах асуудлыг шийдвэрлэжээ
Ховд аймагт бусдын гарт амь насаа алдсан охины аав С.Аманжол болон өмгөөлөгчдийн багийг өнөөдөр ХГБХХЕГ-ын дарга хүлээн авч уулзаж, охины ар гэрт үзүүлэх шаардлагатай дэмжлэг, үйлчилгээний талаар ярилцаж шийдвэрлэсэн байна. Охиныг эрэн хайх үйл явцаас эхлээд өнөөдрийг хүртэл Хүүхэд, гэр бүлийн хөгжил, хамгааллын ерөнхий газраас Ховд аймгийн Хүүхэд, гэр бүлийн хөгжил, хамгааллын газрыг арга зүйгээр хангаж, тухайн гэр бүлд үйлчилгээгээ үзүүлсээр байна.
Хэрэг хянан шийдвэрлэх үйл явц үргэлжилж байгаа энэ хугацаанд охины ар гэр Улаанбаатар хотод амьдрахаар болсон. Харин ах, дүү нарынх нь хичээл номыг тасалдуулахгүй сурах эрхийг хангах үүднээс Улаанбаатарт амьдрах харьяаллынх нь дагуу шилжүүлэн суралцуулах асуудлыг Боловсролын ерөнхий газрын дарга Х.Тамиртай уулзаж шийдвэрлэжээ.
Амиа алдсан охины аав ээж, ах эгч, дүүгийн сэтгэл зүйн байдал маш хүнд, тогтворгүй байгаа тул сэтгэл зүйн үйлчилгээний төрлөөр мэргэшсэн ОУ-ын сэтгэл зүйчдийн багийг Ховд аймагт ажиллуулахаар төлөвлөжээ. Мөн тус агентлагаас холбогдох мэргэжилтнүүд очиж шаардлагатай дэмжлэг, үйлчилгээгээ үзүүлж ажиллахаар болсон байна.
Тухайн гэр бүлийн ЕБС-ийн насны хүүхдүүдийн хичээлийн жилд шаардлагатай хувцас хэрэгслийг бэлдэж өгөхөөс гадна, нийгмийн хариуцлагын хүрээнд өмгөөлөл, хууль зүйн үйлчилгээ үзүүлж байгаа юм байна.
