Өмгөөлөгч Д.Баттулга: Б.Эрдэнэсүх албан тушаалаа ашиглан хохирогчид элдэв янзын хэрэг үүрүүлэх гээд байгаа
23 жилийн турш гэр бүлийн хүчирхийлэл үйлдсэн гэх НИТХ-ын төлөөлөгч Б.Эрдэнэсүхэд холбогдох хэргийн гэм буруугийн шүүх хурал өнөөдөр 09.00 цагт Хан-Уул, Баянгол, Сонгинохайрхан дүүргийн Эрүүгийн хэргийн анхан шатны тойргийн шүүхэд эхэлсэн. Одоогоор шүүх хуралдаан түр завсарлаад байна.
Шүүх хуралдаанд орохын өмнө Б.Эрдэнэсүх манай сайтад тодруулга өгөхдөө: Манай эхнэр байсан О.Нарангарав "Худал мэдээллээр хүнийг гэмт хэрэгт гүтгэсэн" үндэслэлээр яллагдагчаар татагдсан. Мөн хамрын гоо сайхны хагалгаанд орсон зургаараа зодуулсан гэж Монголын ард түмнийг хуураад явж байна" гэсэн юм.
Харин хохирогч О.Нарангаравын өмгөөлөгч Д.Баттулга дээрх мэдээллийг үгүйсгэж, “Манай үйлчлүүлэгч О.Нарангарав огт гоо сайхны хагалгаанд орж байгаагүй. Б.Эрдэнэсүх албан тушаалаа ашиглан хохирогчид элдэв янзын хэрэг үүрүүлэхийг оролдож байна. О.Нарангаравын зүгээс маш их гомдолтой байгаа” гэж мэдэгдлээ.
