Оюутолгойн ногдол ашгаас "Нэг иргэнд 857 мянган төгрөг бэлнээр олгох" өргөдөл 100 мянган иргэний санал авсан тул ЭЗБХ-нд шилжүүллээ

Монгол Улсын иргэн Х.Оюунбилэг Оюутолгойн ногдол ашгаас "Нэг иргэнд 857 мянган төгрөг бэлнээр олгох" нийтийн өргөдөл санаачилж, улмаар 100.094 иргэний санал авсан тул холбогдох хуулийг боловсруулах ажлын хэсэг байгуулж, УИХ-аар хэлэлцэхээр болсон. Тэгвэл өнөөдрийн чуулганы эхэнд УИХ-ын дарга С.Бямбацогт дээрх өргөдлийг холбогдох байнгын хороонд шилжүүлж буйгаа мэдэгдлээ.

Тэрбээр "Байгалийн баялгийн эзэн нь ард түмэн юм бол өгөөжийн эзэн нь ч ард түмэн байх ёстой. Гэхдээ байгалийн баялгийн өгөөжийг иргэдэд хүртээхдээ сэтгэлийн хөөрлөөр биш нарийн тооцоо, судалгаатай хандах ёстой" хэмээгээд, дээрх өргөдлийг УИХ-ын Өргөдлийн байнгын хороо, Эдийн засгийн байнгын хороонд шилжүүллээ.